Nasupot sa net ang 3-pointer ni Isaac Okoro 1.1 seconds na lang sa orasan at inagawan ng Cleveland ng panalo ang Brooklyn 116-114 sa NBA game Huwebes ng gabi sa Barclays Center.

Sa pang-11 points ni Okoro ay hindi nasayang ang team-high 31 points ni Donovan Mitchell. May 25 pts., 16 rebounds si Evan Mobley at 12-10 si Jarrett Allen sa Cavaliers (47-28) na nanatili sa fourth sa East.

Tapon sa basurahan ang 32 points ni Mikal Bridges at 25 markers, 12 assists ni Spencer Dinwiddie sa Nets (39-34) na napigil sa seventh, kalahating laro sa likod ng Heat (40-34) sa huling slot sa sure playoffs na hindi dadaan sa play-in.

Abante pa ang Brooklyn 104-94 kalagitnaan ng fourth pero tyinaga ng Cavs.

Sa final 9 seconds, dalawang beses nagmintis ang tip shot ni Mitchell bago hinablot ni Caris LeVert ang offensive board at binatuhan si Okoro sa sulok para sa winner. (Vladi Eduarte)