Nag-uwi ng tatlong gintong medalya ang national team sa pamamagitan ng mag-utol na Sydney at Chino Sy-Tancontian at si Aumaegel Princess Cortez sa 2023 Korea Open Sambo Championships Linggo ng gabi sa Korea Sambo Center sa Cheon-An, South Korea.
Dinispatsa ng 23-anyos, five-time world medalists at two-time Asian champion na si Sydney ang Mongolian samboist sa finals upang magtagumpay sa women’s +80kgs category.
Hinablot ni Chino, 2023 Cambodia SEA Games freestyle wrestling silver medalist, ang ginto sa men’s under-98kgs division, habang hinakbangan ni Cortez ang isang hometown bet fighter para sa gold din women’s under-59kgs class
Silver naman ang mga pinitas nina national coach Jerry Legaspi sa men’s under-88kgs combat sambo, Godwin Langbayan sa men’s under-64 combat sambo, Aislinn Yap sa women’s under-80 sport sambo at Troy Legaspi sa men’s under-64 sports sambo.
Nag-bronze medal si Jedd Kim sa men’s under-79 sports sambo.
“Sobrang happy sa naging resulta ng aming pinaghirapan,” bulalas ni Pilipinas Sambo Federation Inc. president Paolo Tancontian na kasama sa delegasyon gaya ni coach Ace Larida. “Our national team really prepared well on this tournament. They improve a lot on this tourney and we hope to see them perform well on the next competitions.” (Gerard Arce)
