Para kay John Amores, ang pagkakasungkit sa kanya sa PBA ang umpisa para maitama niya ang nagawang pagkakamaling pang-amok noong nakaraang taon sa isang NCAA game.

Sa 38th PBA Draft nitong Sept. 17 sa Market! Market sa BGC, Taguig, biningwit siya ng NorthPort Batang Pier sa fifth round.

“Ito ‘yung umpisa para maitama ko at maipakita sa mga tao na gagawin ko ‘yung para sa ikakabuti ng career ko,” lahad ni Amores sa mga reporter na nag-cover sa kaganapan.

Nangako rin siyang tutulungan ang koponan sa abot ng kanyang makakaya lalo na sa depensa.

“Gagawin ko lang pinaka-best ko. Kung ano matutulong ko, kung ano kailangan ng team, especially defense, ‘yun ipo-provide ko,” saad pa niya.

Sinipa si Amores sa JRU Heavy Bombers makalipas na pagsasapakin ang ilang player ng College of St. Benilde Blazers.

Binigyan siya ng tsansa ng Zamboanga Valientes sa ASEAN Basketball League at naging parte rin ng Muntinlupa Cagers sa Maharlika Pilipinas Basketball League hanggang sa mag-apply siya sa PBA. (Issa Santiago)