WebClick Tracer

NEWS

Human trafficking, online scam sa Multi Village pinasisiyasat

Pinasisiyasat ng isang senador ang umano’y human trafficking at mga online scamming activities na sinasabing nangyayari sa loob mismo ng Multinational Village sa Parañaque.

“Kailangang matukoy ang mga lapses at butas sa mga proseso sa gobyerno at pambansang seguridad na humantong sa pagtaas ng bilang ng krimen na kadalasang kinasasangkutan ng mga dayuhan. Ang mga ito ay nagdudulot ng malubhang banta sa seguridad at kaligtasan ng mga mamamayang Pilipino,” sabi ni Senador Sherwin Gatchalian na naghain ng Senate Resolution No. 1032.

Sabi ng senador, nakatanggap ang kanyang opisina ng sulat na may petsang Mayo 8, 2024, mula sa isang grupo ng homeowners sa Multinational Village, kung saan umaapela sila sa mga awtoridad para sa kanilang seguridad at magsagawa ng imbestigasyon sa sinasabi nilang lumalaking populasyon ng mga kahina-hinalang dayuhan sa kanilang komunidad.

Ayon sa mga homeowner, mayroong isang lugar sa loob ng naturang subdibisyon na tinatawag na ‘City Garden’, isang enclave na eksklusibong pinupuntahan at tinitirhan ng mga dayuhan, kung saan hindi bababa sa 50 dayuhan ang nagsisiksikan sa loob ng mga inuupahang unit ng pabahay dito.

Kamakailan lang ay sinalakay ang isang bahay sa 18 Tejeran Street sa loob ng subdibisyon at nahuli ang 10 Chinese nationals na umano’y nagsasagawa ng mga aktibidad ng pang-ii-scam, tulad ng love at cryptocurrency scam. Arestado rin ang isang bodyguard na Pinoy dahil sa kanyang undocumented .45 caliber pistol.

Ang mga nadakip na dayuhan ay hinihinalang mga pugante mula sa naunang ni-raid na POGO compound sa Bamban, Tarlac noong nakaraang Marso.

Isinagawa ang nasabing raid dahil sa umano’y paglabag ng kompanya sa Republic Act 9208 o ang Anti-Trafficking in Persons Act of 2003; RA 562, kilala rin bilang Alien Registration Act of 1950; at RA 10175, na kilala rin bilang Cybercrime Prevention Act of 2012. (Dindo Matining)

Ano ang masasabi mo sa balitang ito? (Mag-komento)

TELETABLOID

Follow Abante News on