Abante Tonite
Mabilis sa Balita

Disiplina ng mga residente, nagbubunga na

0 148

Unti-unti ay nagbubunga na ang ating pagtitiyaga sa paulit-ulit na pananawagan sa mga residente ng Maynila na palagiang magsagawa ng kusang disiplina at mahigpit na sundin ang lahat ng health protocols sa loob at labas ng kani-kaniang tahanan.

Masasabing pruweba nito na hanggang Agosto 31, ang anim na ospital na pinatatakbo ng lungsod ay nakapagtala ng mababang ‘occupancy rate’ o pagkakapuno, sa gitna ng pagpapatuloy ng pandemya at kawalan pa din ng tiyak na gamot o bakuna laban sa COVID-19.

Sa kabutihang-palad, sinabayan din ito ng patuloy na pagtaas ng ‘recovery rate’ o bilang ng mga gumagaling sa COVID-19, batay na din sa records mula sa aming city health department.

Ang kabuuang bilang ng aming mga kama sa anim na pampublikong ospital sa lungsod ay umaabot ng 943. Ang nakatalaga para sa COVID ay 321. Mula sa bilang na ito, ang okupado ay 165, na kung susumahin ay katumbas ng ‘occupancy rate’ na 51 percent lamang hanggang Agosto 31.

Sana, at ako ay umaasa, na magpatuloy ang ganitong sitwasyon sa lungsod. Mangyayari lamang ito kung patuloy na makikiisa ang mga reidente mismo, sa pamamagitan ng pag-aalaga sa kani-kanilang sarili na, kapag ito ay kanilang ginawa ay para na rin nilang pinagmalasakitan ang kanilang mga mahal sa buhay.

Mananatiling protektado ang mga pamilya nila kung sila ay ligtas sa nasabing virus.

Kailangan ng ating mga ospital ang ganitong ‘elbow room’ upang hindi sila mabulunan sa gitna ng posibilidad na magkaroon pa rin ng pagtaas sa kaso ng COVID-19 habang lumuluwag ang sitwasyon ng quarantine sa bansa.

Dahil diyan ay pinasasalamatan at binibigyan kong kredito ang aking mga mahal na Batang Maynila na sa aking palagay ay alam na ngayon ang lala ng sitwasyon at ang panganib na dala ng pananatili ng COVID-19 sa ating paligid.

Siyempre pa, ang aming pasasalamat sa mga tinaguriang ‘modern-day heroes’, ang ating mga medical frontliners na walang pagod sa pag-aalaga ng mga biktima ng COVID-19, sa aktibo nilang paghingi ng mga kinakailangang equipments, gamot at iba pang supplies na nagbunga ng magandang ‘recovery rate’ sa lungsod.

Kami naman sa pamahalaang-lungsod ay hindi magsasawang pagbutihin pa ang mga serbisyong nailatag na namin para sa mga taga-Maynila.

Sa katunayan, sa gitna ng lahat ng hakbangin laban sa COVID-19, kami ni Vice Mayor Honey Lacuna ay nagpasyang magbigay ng P100,000 cash reward para sa mga ‘COVID-free barangays’. Ang mga barangay na walang COVID case sa loob ng dalawang buwan mula September 1 hanggang October 31, 2020 ang siyang makakatanggap ng nasabing halaga.

Bukod diyan, naglaan na din ang inyong lingkod ng P2 million para sa pagbili ng fuel oil para sa libreng free cremation ng COVID-19 victims sa Manila North Cemetery (MNC).

Sa ilalim kasi ng alituntunin ng Inter-Agency Task Force (IATF) on Emerging Infectious Diseases, ang katawan ng mga pasyenteng namatay sa COVID-19 ay dapat na i-cremate sa loob ng 12 oras.

Habang ako ay hindi natutuwa sa anunsyo dahil tungkol ito sa patay, ang bagong alokasyon na ito ay para sa benepisyo ng mga hindi kayang balikatin ang napakataas na presyon ng cremation. Ang libreng serbisyong ito ay para sa mga residente ng Maynila na namatay sa COVID-19.

Hindi ko kasi masikmura na may mga taong walang konsensiya na kayang pagkakitaan ang kalungkutan ng iba.

Alam ko kung gaano kasakit para sa mahirap ang makaranas ng pagkawala ng mahal sa buhay at walang pera para panggastos. Naranasanko ito mismo nang mamatay ang lolo ko nung bata pa ako at wala kaming pera.

Nag-uumpisa pa lang ako sa showbiz noon at kinailangan kong umalis para kumita ng pera. Gayunman, nailibing na ang lolo ko nang bumalik ako at di na umabot ang perang kinita ko.

Kaya naman sa aming maliit na kaparaanan, nais naming maibsan ang pagdurusa ng mga pamilyang mahihirap na nawalan ng kapamilya dahil sa COVID-19. Bilang kapalit ay hiling naman namin sa mga residente na makiisa nang todo at gawin ang lahat ng protocols upang mapigilan ang pagkalat ng coronavirus.

***

Gaya ng paulit-ulit kong sinasabi, kailangan ko ang tulong ninyong lahat. Walang magmamalasakit sa Maynila kundi tayo ding mga Batang Maynila. Manila, God first! *** Maari ninyong malaman ang mga pinakahuling kaganapan sa pamahalaang-lungsod ng Maynila sa pamamagitan ng pagbisita sa aking kaisa-isang lehitimong Facebook account— ‘Isko Moreno Domagoso.’

Leave A Reply

Your email address will not be published.