Abante Tonite
Mabilis sa Balita

Hindi proteksyon ang steroid laban sa COVID -19

0 189

Lumolobo, tinatadtad ng taghiwayat, napapalakas ang kain, hindi makatulog at iritable. Ilan lang yan sa panlabas na epekto ng dexamethasone, isang steroid na kadalasang ginagamit ng may lupus, arthritis, asthma at severe allergy. Ang mas matindi ay ang panloob na epekto tulad ng pagtaas ng blood sugar, paghina ng mga muscles, hindi gumagaling agad ang sugat at nagkaka-heartburn.

Ang dexamethasone ay anti-inflammatory. Pinipigil nito ang immune system na maging overactive. Ginagamit ito ng mga may autoimmune disease dahil masyadong aktibo ang kanilang immune system at inaatake tuloy kahit ang kanilang mga matitinong cells, dahilan kung bakit lalong bumabagsak ang kanilang katawan at hindi nakakalaban sa sakit.

Ito ang dahilan kung bakit hindi epektibo ang gamot na ito na pamproteksyon laban sa Covid-19 o panggamot sa mga may mild to moderate na kaso ng Covid-19.

Ayon sa mga researchers ng United Kingdom, nakita nilang epektibo lamang ang dexamethasone para sa mga malala ang kondisyon dahil sa Covid-19.

SM SuperKidsDay Banner Ad

Sa kanilang controlled clinical trial, gumanda ang kalagayan ng mahigit 2000 pasyenteng may Covid-19 na kritikal ang kondisyon makaraang mabigyan ng low hanggang moderate dose na 6 milligrams kada araw sa loob ng 10 araw.

Bumaba rin ng 20% ang panganib na sila ay masawi dahil sa Covid.

Maraming nagsamantala nang lumabas ang balita at nagbenta online ng dexamethasone. May isa ring injection na may ganitong laman ang lalong nagsumigasig sa pagpo-promote nito online.

Ang babala ng mga doktor at ng Department of Health: delikado ang dexamethasone o steroid kung gagamitin sa hindi naman overactive ang immune system o walang inflammation. Hindi mahahadlangan ng steroid na ito ang pagpasok sa katawan ng Covid-19 at hindi rin matutulungan ang immune system ng mga hindi naman malala ang kaso ng Covid-19. Baka mas lalong matalo sa laban sa Covid-19 kung uunahan ng dexamethasone ang immune system. Mas mabuting pabayaan muna natin ang ating natural na resistensya na makipaglaban sa virus kaysa patahimikin natin ito at baka lalong maging delikado ang ating buhay.

Huwag basta bibili o gagamit ng dexamethasone kung hindi ipinapayo ng ating manggagamot. Buhay natin ang nakataya rito.

Leave A Reply

Your email address will not be published.