Abante Tonite Interactive

Kristiyano, Muslim, Filipino

By
13

Matapos tayong magbigay-pugay sa kabayanihan ng mga sundalo at pulis na nakipaglaban lalo na ang mga pumanaw para mapalaya ang Marawi City sa galamay ng terorista at bandido, hindi rin natin dapat kalimutan ang ginawang pagmamalasakit ng mga kapatid nating Muslim para iligtas ang mga kapatid nilang Kristiyano sa kalupitan ng Maute Group.

Dahil nagpapakitang gilas ang Maute sa international terrorist group na ISIS, na kilalang pumapatay ng mga Kristiyano sa mga sinasalakay nilang mga lugar sa Gitnang Silangan, ganito rin ang nais gawin ng mga bandidong umatake sa Marawi.

Katunayan, sa unang mga araw pa lang ng kaguluhan, napaulat na ang pagkakakita ng siyam na bangkay ng mga Kristiyano na tadtad ng tama ng bala at makatali ang mga kamay nang patayin daw ng mga terorista.

Ilang Kristiyano rin ang kanilang tinangay at ginamit na hostage. Hindi pa batid ang kanilang naging kapalaran.

Para sa kaalaman ng ating mga kasangga, higit 90 porsiyento ng populasyon o nakatira sa Marawi ay mga Muslim.

Akala marahil ng Maute group at mga alipores na Abu Sayyaf leader na si Hapilon, eh kokonsintihin ng mga kapwa nila Muslim ang ginawa nilang kalokohan sa lungsod na ngayon ay halos mapulbos sa tama ng mga bala at bomba, at daang libo ang naging bakwit.

Alam niyo ba, mga tsong, na bago tawagin na Marawi City ang Marawi noong 1956, ang pangalan ng lungsod na ito ay Dansalan, at ang mga naninirahan ay mga Maranao, na kaugnay sa “ranao” o lawa dahil sa katubigan sa paligid nito.

Kahit malayo sa Luzon, hindi nakaligtas sa mga mata ng mga dayuhang mananakot na Kastila at maging mga Amerikano ang Marawi noon.

Pero kahit nga kontrolado ng mga Muslim ang Marawi at kapwa nila Muslim ang mga pasaway na sumalakay sa kanilang lungsod, hindi pa rin hinayaan ng mga residente na mapahamak ang mga Kristiyano. Marami ring nakakabilib at nakakaluhang kuwento ang iniulat sa media.

Gaya na lang ng isang Muslim na guro na itinago sa loob ng paaralan ang mga estudyanteng Kristiyano.

Mayroon ding Muslim na kasama sa ARRM-Heart na nagbigay din ng proteksyon sa mga nakita niyang kabataang Kristiyano.

At may isang among Muslim na tinuruan ang kanyang mga trabahador na Kristiyano kung papaano magpanggap na Muslim para hindi sila patayin ng Maute.

Nagkaroon pa ng pagkakataon na sabay sa pagtakas ang mga Kristiyano at Muslim para makalabas ng Marawi at itinatago ng mga residenteng Muslim ang mga Kristiyano sa pagsigaw ng “Takbir, Allahu Akbar!” kapag nakakakita sila ng mga Maute sa kalye.

Bagaman inabot na ng halos isang buwan ang krisis at hindi pa rin lubos na nauubos na ang Maute, isang bagay lang ang sigurado  hindi magtatagumpay ang mga terorista at bandido sa masama nilang plano dahil sa ipinakitang pagkakaisa ng mga Muslim at Kristiyano bilang isang Filipino.

Laging tandaan: “Bata mo ‘ko at Ako ang Spy n’yo.” (Twitter: follow@dspyrey)