Abante Tonite
Mabilis sa Balita

Magbitiw o magbakasyon?

0 366

Umeksena na mga tsopapips ang Office of the Ombudsman at magsasagawa ng imbestigasyon sa mga isyung idinidikit kay Health Secretary Francisco Duque III na para namang may pandikit sa kamay sa higpit nang pagkakapit sa puwesto niya.

Hindi biro ang sinabi ni Ombudsman Samuel Martires, na parang may itinatago raw ang DOH nang humihingi sila ng ilang impormasyon tungkol sa pagtugon ng ahensiya sa COVID-19 pandemic. Alam natin na katakot-takot na puna ang ibinabato kay Duque sa naging pagkilos ng DOH para maagapan sana ang pagkalat ng virus.

Naghain pa nga resolusyon ang mayorya sa mga senador noong Abril para ipanawagan ang kaniyang pagbibitiw dahil palpak daw ang mga galaw ng DOH simula nang unang maramdaman ang virus sa Pilipinas. At pagkaraan ng ilan pang buwan, sa halip na humusay, eh kabi-kabila pa rin ang naging puna kay Duque tulad ng magkakaibang pahayag niya tungkol sa second wave daw ng virus, at hindi raw nakakahawa ang mga walang sintomas ng sakit.

Idagdag pa diyan ang pagkakaantala ng benepisyo para sa mga medical frontliner na tinamaan ng virus at nasawi o nanganib ang buhay. Mantakin nyong kung hindi pa napag-usapan sa pagdinig ng Senado ang tungkol sa panukalang batas para sa recovery ng ekonomiya ng bansa, aba’y hindi mapag-uusapan ang benepisyo ng mga dakilang medical frontliners na nasa Bayanihan To Heal As One Act.

Ang matindi nito mga tropapips, nang pag-usapan ang naturang benepisyo sa isang televised briefing ni President Mayor Digong Duterte, inamin ni Duque na nakakahiya ang nangyari pero ang sinisi niya eh ang kaniyang mga tauhan. At nang atasan ng pangulo si Duque na ibigay na ang dapat ibigay, aba’y ilang araw lang eh nagawa na. Ang tanong, kung kaya naman palang gawin nang ilang araw lang, bakit inabot nang pagkatagal-tagal ang pagbibigay ng naturang benepisyo kung hindi pa napag-usapan sa Senado?

Kasama sa mga iimbestigahan ng Ombudsman ang naturang isyu ng naatrasong benepisyo. Hahalungkatin din ng isyu tungkol sa pagbili ng DOH ng 100 thousand test kits, ang naatala ring pagbili ng Personal Protective Equipment at iba pang gamit na proteksyon ng mga healthcare worker laban sa COVID-19, ang pagdami ng mga medical health worker na namatay at nagkasakit dahil sa virus, at muli, ang naantalang pagrereport at nakalilitong datos ng mga kaso ng COVID-19.

May mga mambabatas ang nagpapayo kay Duque na bumitiw na sa kaniyang puwesto para hindi na madamay si President Mayor Duterte sa mga kapalpakan daw nito. Pero kung ayaw pa rin niyang magbitiw, may nagmumukahi rin sa kalihim na magbakasyon na lang muna o mag-leave of absence para maging malaya ang imbestigasyon at pagkuha ng Ombudsman sa mga hinahanap nilang dokumento.

Aba’y malay natin, baka kapag nagbakasyon si Duque eh may mga lumakas ang loob sa DOH na magsasalita tungkol sa kanilang nalalaman? Baka naman ito rin ang dahilan kaya ayaw niyang umalis. Hindi kaya?

Hirit ng ilan nating kurimaw, bagaman hindi naman mawawala ang COVID-19 kapag nawala si Duque, baka naman daw may naiisip na mas mahusay na paraan ang papalit sa kaniya kung papaano dapat solusyon ang patuloy na dumadaming kaso ng COVID-19. Sino nga ba sa tingin ninyo ang puwedeng ipalit kay Duque? Laging tandaan: “Bata mo ‘ko at Ako ang Spy n’yo.

Leave A Reply

Your email address will not be published.