Laro ng Filipinas ngayong Lunes:
(IPE Chonburi Stadium, Thailand)
7:30pm – Filipinas vs Vietnam
PUWERSADO sina Mallie Ramirez at ang Philipiine National Women’s Football Team o Filipinas na ipanalo ang huli nitong laban ngayong Lunes ng gabi kontra Vietnam sa ginaganap na 2025 Southeast Asian Games sa IPE Chonburi Stadium sa Chonburi, Thailand.
Ito ay matapos na mabigo ang pambansang koponan ng football ng kababaihan ng Pilipinas sa Myanmar, 2-1, sa kanilang unang laro sa 2025 Southeast Asian Games noong Biyernes.
Ang resulta ang naglagay sa mga Pilipina sa isang mahirap na sitwasyon kung saan kinakailangan nitong talunin ang makakalaban na Vietnam upang masiguro ang pag-usad nito sa susunod na labanan.
Tanging ang nangungunang dalawang koponan sa bawat grupo ang makakarating sa knockout stage.
Isang huling goal ni May Htet Lu ang sumira sa puso ng mga Filipina, na minalas pa matapos na mawala ang batang striker na si Nina Mathelus dahil sa injury.
Nakauna ang Myanmar, kung saan sinalo ng kapitan na si Win Theingi Tun ang isang mahinang clearance mula sa backline ng mga Filipina upang talunin si Olivia McDaniel gamit ang isang rocket papunta sa itaas na sulok sa ikalimang minuto lamang.
Gayunman, nagbunga ang atake ng mga Filipina sa ika-69 na minuto nang ma-fumble ng goalkeeper ng Myanmar na si Myo Mya Mya Nyein sa isang save mula sa isang header ni Jessika Cowart at naroon si Mallie Ramirez para sa rebound na nagpatabla sa laro, 1-1.
Maraming pagkakataon para sa mga Filipina na maka-abante na pinakahuli nang talunin ni Alexa Pino ang kanyang defender para sa isang mahusay na solo sa ika-75 minuto. Gayunman, nakahanda ang Burmese goalkeeper, at nakapagtala ng double-save nang subukang ipasok ni Guy ang rebound.
Nagbago ang momentum laban sa Filipinas noong ika-86 na minuto, nang tila nagtamo ng injury ang 17-taong-gulang na si Mathelus at kinailangang tulungan palabas ng field.
Pagkalipas ng tatlong minuto, sumugod ang Myanmar at na-convert ni May ang isang free header para muling bigyan ang kanyang koponan ng kalamangan.
Mayroon pa ring ilang pagkakataon ang mga Filipina, dalawang beses na nanalo ng free kicks sa loob ng kanilang sariling half, ngunit matatag ang depensa ng Myanmar na agad nagpalasap sa koponan ng kabiguan. (Lito Oredo)
