Abante Tonite Interactive

Mga Pogo worker kalat na hanggang Laguna

472

Dumadagsa pa rin ang mga dayuhang iligal na nagtatrabaho sa bansa sa kabila ng gi­nagawa na ngayong paghihigpit ng Bureau of Immigration (BI) sa mga ito.

Nito lamang nakali­pas na linggo ay mahigit 300 Chinese nationals ang ipina-deport ng gobyerno pabalik sa China matapos mapatunayang iligal ang pananatili at pagtatrabaho ng mga ito sa mga kompanya ng Philippine Offshore Ga­ming Operators (POGO) na pinapatakbo rin ng mga dayuhang negos­yante.

Kung dati ay napapansin lang ang pagdami ng illegal fo­reign workers sa Metro Manila at Subic area, na­kaabot na rin ang mga ito sa ilang lugar sa Laguna.

Ang dating bakanteng mga lote malapit sa isang water ad­ven­ture park sa Laguna ay mayroon ng mga naitayong low rise building na ang mga nakatira ay mga dayuhan.

Mabilis ang pagda­mi ng mga ito at nagtatrabaho sa mga online gaming na nasa commercial centers sa lalawigan.

Bagama’t hindi naman nanggugulo ang mga dayuhang illegal workers, ang tingin ng mga Pilipino ay ina­agawan sila ng oportunidad at trabaho ng mga ito dahil mara­ming mga Pinoy ang wala pa ring trabaho.

Pero ang katwiran naman ng mga nagmamantine ng online gaming, may balakid sa mga Pinoy dahil hindi marunong ang mga ito na magsalita ng Mandarin, ang sa­lita ng mga Chinese.

Ito ang dahilan kaya mga Chinese ang kinuhang magtrabaho sa online gaming.

Bagama’t naghihigpit naman ang BI sa mga dayuhang ill­e­gal workers, medyo pinagdadahan-dahan sila ang Malacañang da­hil isinaalang-alang ang mga Pilipinong nagtatrabaho rin sa China na posibleng maapektuhan kapag agad-agad na pinalayas ang mga ito sa bansa.

Kapag magiging masy­adong maluwag ang gobyerno sa mga ito, posibleng sa mga susunod na araw ay nakakalat na ang mga ito sa mga panguna­hing siyudad sa bansa at lalong liliit ang tsansa ng mga Pinoy worker na makakuha ng trabaho dahil sa mga ito.

Dapat magkaroon din ng malinaw na polisiya ang Department of Labor and Employment sa mga POGO foreign worker dahil hanggan nga­yon ay kuwestiyon pa rin kung dapat bang pagbayarin din ang mga ito ng buwis dahil hanggang ngayon ay walang napapakinabangan sa kanila ang gobyerno.