Abante Tonite Interactive

Motorsiklo ng pulis sumemplang, pedestrian nasagasaan

250

Patay ang isang la­laking pedestrian nang mahagip ng sumemplang na motorsiklo na minamaneho ng isang pulis sa Parañaque City kamakalawa.

Hindi na umabot nang buhay sa Ospital ng Parañaque si Efren Tibunsay y Lozada, 47-anyos, sanhi ng tinamong mga sugat habang nilalapatan naman ng lunas sa Uni-Health Medical Center ang nakamotorsiklong si PO2 Randy Morales y Calumpiano, 38-anyos, nakatalaga sa Police Community Precinct 3 ng Las Piñas City Police sanhi ng mga sugat na tinamo sa katawan.

Sa report ng Southern Police District, naganap ang aksidente sa Dr. A Santos Avenue sa harap ng Loyola Memorial Park alas-9:30 ng umaga.
Minamaneho ni Morales ang Yamaha Mio 125 nang bigla umanong mawalan ng kontrol ang motorsiklo hanggang sa sumemplang at masagasaan nito ang tumatawid na si Tibunsay.

Mabilis namang isinugod si Tibunsay sa pagamutan subalit binawian ng buhay.

Posibleng maharap sa kasong reckless imprudence resulting in homicide ang naturang pulis.