Abante Tonite Interactive

Opisyal ng gobyerno namburaot ng cellphone

By
9

Hindi ako makapaniwala sa impormasyong aking nakalap hinggil sa isang mataas na opisyal ng ating gobyerno.

Unang-una, isa siyang­ babae at higit sa lahat ay hindi mo pag-iisipang gagawa siya ng kamalasaduhan sa harap mismo ng mga mamamahayag.

Pero in fairness sa ­lady official na ito, hindi naman para sa kanyang personal na pangangailangan ang binu­raot niyang mga cellphone kundi para sa kanyang mga staff.

Sa kuwentong aking­ nasagap, ito raw si lady­ ­official na appointee ni Pangulong Rodrigo­ Duterte ay dumalo sa isang event sa Malacañang.

Nagkataong nagka­kabigayan ng cellphone sa Malacañang para sa isang importanteng akti­bidad na iho-host ng ating gobyerno.

May ibang media ang nabigyan ng cellphone. May ilan namang binigyan pero tinanggihan ang bigay na cellphone ng Malacañang sa hindi­ ­natin malamang kadahilanan.

Ibig sabihin ang pamimigay ng cellphone ay malinaw na sa mga media lamang na nagko-­cover ng Malacañang. Kusang ibinigay at hindi hiningi.

Pero si lady official na animo’y isang maamong tupa ay umepal. Bumulong daw ito sa namama­hagi ng cellphone at ini­hirit ang kanyang mga staff.

Take note, mga staff, hindi isa o dalawa kundi limang staff ang inihingi niya ng cellphone.

Ang nais nating ipunto ay ganu’n siya gumamit ng kanyang impluwensiya. Kumbaga­ ­brasuhan na tipong walang dahilan para tumanggi ang isang hinihiritan, bagay na naka­kabahala dahil nakatalaga ito sa sensitibong puwesto sa ating gobyerno.

Kung ganyan siya kaga­rapal sa maliit na bagay, paano pa sa malakihang mga transaksyon? Hindi kaya mas matin­ding panghaharbat pa ang kanyang ginagawa sa likod ng media, dahil­ sa harap ng media ay ­nagawa niya ito nang garapalan?

Wala naman sanang masama kung humi­ngi siya ng cellphone kung ­talagang ibinibigay ito nang libre pero, Mam, konti namang pino, ­huwag masyadong garapalan o atribida dahil nakakahiya, lalo na sa kinakatawan ninyong tanggapan ng gobyerno­ na isang matinong tanggapan na bibihirang ­maeskandalo.

Sabagay hindi ­lamang ang opisyal na ito ang naakusahang nanghahar­bat, may ilan pang mga opisyal pero mariing ­tumatanggi sa ibinabatong akusasyon laban sa kanila.

Kaya sa mga opisyal­ ng gobyerno na tipong may ugaling magpalibre,­ tumanggap ng regalo­ o humirit, mag-isip kayo ng maraming ­beses ­bago ninyo ito gawin ­dahil mismong si ­Pangulong Duterte nga ay hindi tumatanggap ng anumang regalo para hindi maakusahang nagpapasuhol, aba’y dapat ­ganundin kayo bilang ­appointee ng Pangulo!