Abante Tonite Interactive

Right of way

By
320

Dear Atty. Claire,
Good day po! Sana po ay matulungan niyo kami sa aming problema.

Legal po bang tayuan ng 2 storey structure with open roof deck ang right of way (eskinita) na may sukat na 12m x 2m sa gilid namin na nakadugtong sa main bldg sa likod namin? Ginagawa po itong tambayan, sampayan, at inuman ng mga te­nant ng main building at itinatapon nila ang lahat ng klase ng basura sa bubungan namin at ‘pag nabarahan po ang gutter at downspout namin ay bigla na lang sasabog ang tubig ulan sa loob ng bahay namin na siyang nagiging dahilan ng pagka-damage ng aming properties –nababasa, inaanay at pati electrical wirings ay pumutok na last 2011. Since 2008, 6 na beses na po itong nangyari at ang latest po ay last 21 June 2016. Tatlong beses na na pong nag-Amicable Settlement. ‘Yung bagong lipat na tenant na siga sa aming lugar ay tinakot pa ako na kundi tumahimik ay sasampalin daw niya ako. Paano po ang mangyayari sa Amicable settlement namin sa barangay? Paano po kaya ang dapat gawin sa lalaking nananakot sa akin?
Lubos na gumagalang,

Renato

***

Dear Mr. Renato,

Unang-una po ay hindi maaaring magpagawa ng anumang istruktura sa isang right of way. Ang right of way po ay dapat na walang sagabal dahil nagsisilbing daanan ito.  

Kung iyan ay isang eskinita ay hindi papayagan ng Enginee­ring Department ng lungsod o munisipyo na makapagtayo ang sinuman ng building sa isang daanan. Kung walang building permit ay iligal ang pagpapatayo ng bahay sa nasabing lugar.

Maaari mo silang isumbong sa Enginee­ring Department upang magsagawa ng inspection sa lugar. Kapag napatunayan na wala silang building permit at occupancy permit ay maaari silang kasuhan ng paglabag ng National Building Code.

Tungkol naman sa napagkasunduan ninyo sa barangay ay maaari kang magsumite ng motion to execute sa barangay para ipatupad ang napagkasunduan sa loob ng 6 na buwan mula sa panahon na nagkasundo o mula sa panahon na dapat na ginawa ang napagkasunduan.

Kapag lumagpas na ang 6 na buwan ay maaari ka nang magsampa ng kaso sa korte ng Action to Enforce the Decision based on the ‘kasunduan’ upang mapatupad ang naging kasunduan sa barangay. 

Sa nananakot sa iyo at dumulog ka sa barangay upang sampahan siya ng rekla­mong threat o kaya ay unjust vexation depende sa sitwasyon. Huwag pairalin ang takot dahil lalo ka nilang tatakutin.

Kung may katanungan pa ay tumawag lamang sa 410-7624 o 922-0245 o mag-email sa attorneyclaire@gmail.com.