Abante Tonite
Mabilis sa Balita

‘Tagalaba’ ng ‘maruming’ pera

0 129

Inaalat yata ang Pilipinas mga tropapips pagdating sa pagtingin sa atin ng ibang bansa. Bukod sa pangalawa raw tayo sa kulelat sa COVID-19 resilience study, aba’y nakasama uli tayo sa global money laundering watchlist.

Ang global watchdog na Financial Action Task Force o FATF, ang nagsama sa Pilipinas sa tinatawag na “gray list.” Kasama natin ang Haiti, Malta, at South Sudan.

Samantala ang Bloomberg naman ang may gawa ng COVID Resilience Ranking kung saan pang-52 ang Pilipinas–kasunod ng kulelat na Argentina. Pero sa ibang araw natin pulutanin ‘yan.

Sa isyu ng money laundering mga tropapips, hindi pa naman talaga masamang-masama ang malagay sa “gray list.” Kaya lang, isang kembot na lang ito para malaglag sa “blacklist.”

Ang FATF ang nagbabantay laban sa mga ill-gotten money at mga kinikita sa mga kriminal at ilegal na paraan. Ang mga “dirty” money ika nga, ginagawan ng paraan para maging “clean” money at saka mailalabas sa ibang bansa.

Isa mga binabantayan ng FATF mga tropapips eh mapunta sa mga teroristang grupo ang pera na ginagamit sa kanilang operasyon. Ngayon ang tanong, nagiging “labahan” nga ba ng maruming pera ang Pinas?

Ang isa sa mga sinasabing paraan noon para “malabhan” ang maruming pera eh ipinapadaan sa casino ang “dirty money.” Ang iba, gumagamit naman ng mga bangko.

Noong taong 2000, nasa blacklist ng FATF ang Pilipinas. Kaya gumawa ng hakbang ang gobyerno para labanan ang money laudering at nagpasa ng batas na bumuo sa Anti-Money Laundering Council (AMLC).

Kaya noong 2005, nawala na tayo sa blacklist. Pero dahil nakukulangan ang FATF sa ginagawa ng mga kinauukulang ahensiya, inilagay tayo sa gray list noong 2012. At inalis din naman uli pagkaraan ng isang taon (2013).

At ngayon, balik na naman tayo sa gray list.
Para maalis ulit tayo sa listahan, kailangang magsumite ang AMLC ng tatlong ulat sa loob ng isang taon tungkol sa mga action plan o hakbang na ginagawa ng gobyerno laban sa money laudering.

Umaasa si Bangko Sentral Governor Benjamin Diokno na chairman ng AMLC na makukumbinsi nila ang FATF at maalis tayo sa graylist bago sumapit ang 2023.

Kung magtatagal kasi mga tropapips ang Pilipinas sa listahan ng FATF, isa sa mga maapektuhan nito ang pagpapadala ng remittance ng mga OFW o mga Pinoy sa abroad dahil sisiliping mabuti ang mga perang papasok sa ating bansa.

Aba’y kawawa naman ang mga OFW natin at kanilang pamilya kung mahihirapan silang magpadala o madagdagan ang gastos nila sa pagpapadala.

Sila pa naman ang tagapagsalba ng ekonomiya natin ngayong may pandemic dahil sa perang ipinapadala nila sa Pilipinas sa pamamagitan ng remittance. Iyan eh kahit pa napakaraming OFWs ang napilitang umuwi sa bansa dahil sa pandemiya.

Noong 2020, sinasabing umabot sa $33.2 bilyon ang remittance sa Pilipinas, na bahagya lang natapyasan ng 0.8 percent kumpara sa $33.5 bilyon noong 2019 na wala pang pandemic.

Kaya sana eh maayos agad ng AMLC ang problema sa FATF. Bukod doon, dapat gumawa rin ng paraan ng gobyerno na maiuwi na sa Pilipinas ang lahat ng OFWs na nais nang umuwi, pati na ang mga nasa mga bansang may “travel restriction” ang Pilipinas. Laging tandaan: “Bata mo ‘ko at Ako ang Spy n’yo.”

Leave A Reply

Your email address will not be published.