Abante Tonite Interactive

Traslacion ng Nazareno, salamin sa pananampalataya ng mga Pinoy

322

Ilang araw na lamang ay magaganap na ang hinihintay ng libo-libong deboto na Traslacion ng Itim na Poon ng Nazareno.

Sa tuwing sumasapit ang Enero a-nuwebe ay dumadagsa ang libo-libong deboto sa Quiapo para makilahok sa Traslacion ng Nazareno kaya’t aasahan ang masikip na daloy ng trapiko at kawalan ng pasok sa mga tanggapan sa Lungsod ng Maynila.

Nakasanayan na ng maraming Pilipino ang tanawin ng mala-dagat na buhos ng mga tao sa panahon ng Traslacion simula pa lamang sa Quirino granstand sa Luneta patungo sa Quiapo Church.

Walang pinipiling edad ang mga deboto, bata, matanda, may kapansanan man o wala ay nakikipaggitgitan, masulyapan lamang ang Poon ng Nazareno habang nasa mahabang prusisyon.

10 kilometro ang ruta ng Traslacion ng Nazareno simula Luneta hanggang Simbahan ng Quiapo pero hindi alin­tana ng mga deboto ang pagod at hirap ng gitgitan at kung mamalasin ay matapak-tapakan pa ng mga kapwa deboto at masasaktan.

May mga insidente na ng mga nasawi dahil sa gitgitan sa Traslacion pero tila hindi nagbago ang bilang ng buhos ng tao.

Ang sabi nga ng iba, maaari namang makita at malapitan ang Poon ng Itim na Nazareno sa simbahan sa ordinaryong araw sa halip na makipagsiksikan at makipagbalyahan sa panahon ng Traslacion. Bakit nga ba? Ito kaya ay dahil sa marubdob na pananampalataya o dahil bahagi na ng nakamulatang kultura ng mga Katoliko kahit pa humahantong sa disgrasya.

Mahirap tawaran ang paniniwala at pananampalataya ng mga deboto ng Nazareno. Dito sa Traslacion makikita ang sakripisyo ng mga taong naniniwala sa poon at kung ano man ang hatid na grasya o ginhawa sa kanila ay itinuturing na milagro at sagot sa kanilang kahilingan at mataimtim na paniniwala.

Para matiyak ang kaligtasan ng bawat deboto, naghanda ang gobyerno ng mara­ming miyembro ng Philippine National Police (PNP) na ikakalat sa 25 kalyeng dadaanan ng Traslacion.

Naging bahagi na ng tradisyon sa Traslacion ang papel ng mga awtoridad sa pagtiyak ng kaayusan dahil sa pagsasamantala ng mga mandurukot na nakikihalo sa mga deboto. Hindi lahat ng nasa prusisyon ay iisa ang pakay, ang iba ay magsamantala kaya naman alisto ang mga pulis para hulihin ang mga ito.

At para naman sa mga hindi sasali sa prusisyon pero nasa Lungsod ng Maynila, ipinapauna na ng liderato ng PNP ang paumanhin sa mga maaapektuhan ng pan­samantalang pagputol sa signal ng kanilang telco dahil kasama ito sa pagtiyak ng seguridad sa Traslacion ng Nazareno.